रौतहटको कटहरिया नगरपालिकाको मेयर सियाराम कुश्वाहले निर्वाचन आयोग प्रचण्डको पिछलग्गू बनेको कारण जनताको अभिमतबाट निर्वाचित जनप्रतिनिधिहरुले दु:ख पाउनु परेको टिप्पणी गरेका छन् । सर्वोच्च अदालतले पद बहाली गरेपछि मेयर कुश्वाहले पुनः पदभार ग्रहण गर्दै संविधानमा स्थानीय तहका निर्वाचित जनप्रतिनिधिको कार्यकाल सकेमा मृत्यु भएमा अथवा राजीनामा दिएमा मात्र पद रिक्त हुने व्यवस्था रहेको जिकिर गरे ।
प्रचण्डले चितवनमा आफ्नो छोरी जिताउन काँग्रेससँग सहकार्य गर्दा दलबदल कानुन नलाग्ने तर २४ औँ घण्टा जनताको सेवामा लाग्ने जनप्रतिनिधि माथि उक्त कानुन किन लाग्ने भन्दै कुश्वाहाले प्रश्न गरे । आफूले एमालेसँग सहकार्य गर्दा दलबदल आरोप लगाउनु पूर्वाग्रही भएको मेयर कुश्वाहाले गुनासो गरे ।
Advertisement
पदभार ग्रहण गर्नेको अवसरमा नगर प्रवक्ता चन्दन कुश्वाहा, प्रमुख प्रशासकीय अधिकृत रामप्रकाश साह लगायत नगरपालिकाका कर्मचारी तथा जनप्रतिनिधिहरुले फुलको गुच्छा दिएर मेयर सियाराम कुश्वाहालाई बधाई तथा कार्यकाल सफलताको शुभकामना दिनु भएको थियो ।
सो अवसरमा मेयर कुश्वाहाले सर्वोच्च अदालत र कटहरिया नगरवासी लाई धन्यवाद दिँदै विगतको भन्दा अझै सक्रिय भएर जनताको सेवामा लाग्ने बताए । सर्वोच्च अदालतले मङ्गलबार मौलापुर नगरप्रमुखका साथै कटहरियताका मेयर सियाराम कुश्वाहालाई यथास्थितिमा कामकाज गर्न आदेश दिएको थियो ।
स्थानीय निर्वाचनमा तत्कालीन नेकपा माओवादीको टिकट बाट निर्वाचित भएर पछिल्लो समय एमालेलाई सघाएको भन्दै माओवादीको केन्द्रीय कमिटीको निर्णय अनुसार प्रचण्डले उनीहरूको पद रिक्त अथवा कार्वाही गर्न निर्वाचन आयोगमा पत्र पठाएका थियो ।
सोही आधारमा निर्वाचन आयोगले २ मेयर ५ उपमेयर सहित १४ जना जनप्रतिनिधिको पद रिक्त गरेको थियो ।
साभार: रातोपाटी
