लुम्बिनी प्रदेश सभामा नेकपा एमाले संसदीय दलका नेता लीला गिरीले बुधबार मुख्यमन्त्रीका लागि दाबी पेश गरेका छन्।
लुम्बिनी प्रदेशका प्रदेश प्रमुख अमिक शेरचनले संविधानको धारा १६८ को उपधारा २ बमोजिमको बहुमतीय सरकार गठनका लागि पुस २७ गते ४ बजेसम्मको समय सीमा तोकेर पुस २१ गते दलहरूलाई आह्वान गरेका थिए।
प्रदेश प्रमुख शेरचनले दिएको अवधि भित्रै दलहरूले मुख्यमन्त्रीका लागि दाबी पेश गरेका हुन्।
Advertisement
गिरीले ७ दलका ५८ सांसदको हस्ताक्षरसहित बुधवार दिउँसो २ बजे मुख्यमन्त्रीको लागि दाबी पेश गरेका हुन्।
मुख्यमन्त्रीको दाबी पेशका लागि सत्ता गठबन्धनमा आवद्ध दलका सांसदहरू हस्ताक्षर सहित उपस्थित भएका थिए।
लुम्बिनी प्रदेशमा सबैभन्दा धेरै सांसदसहित पहिलो दल बनेको एमालेका २९ जना सांसद छन्। सरकारलाई माओवादी केन्द्रका १०, राप्रपाका ४, जसपा, लोसपा र जनमतका ३-३ जना सांसदले समर्थन गरेका छन्।
त्यस्तै चार जना सांसद रहेको नागरिक उन्मुक्ति पार्टी र माओवादी केन्द्रले सांसदको टिकट नदिएपछि स्वतन्त्र रुपमा उठेर निर्वाचन जितेका २ जना सांसदले पनि सरकारलाई समर्थन गरेका छन्।
२७ जना सांसद सहित प्रदेशमा दोस्रो ठूलो दल बनेको नेपाली कांग्रेस र एक-एक जना सांसद रहेका नेकपा एकीकृत समाजवादी र राष्ट्रिय जनमोर्चा भने सरकार बाहिर बसेका छन्।
दाबी पेश गरेपछि प्रदेश प्रमुख शेरचनले आजै गिरीलाई मुख्यमन्त्रीमा नियुक्त गर्नेछन्। मुख्यमन्त्रीको शपथ ग्रहण भने बिहीबार दिउँसो १ बजे देउखुरीमा हुने कार्यक्रम तय भएको छ।
