काठमाडौं । काठमाडौंमा बिहानैदेखि वर्षा भइरहेको छ । आज दिनभर पनि वर्षाको सम्भावना रहेको जल तथा मौसम विज्ञान विभागले जनाएको छ ।
Advertisement
पछिल्लो २४ घण्टामा काठमाडौंमा २५.२ मिलिमिटर वर्षा भएको मौसमविद् राजु प्रधानाङले जानकारी दिए । “बिहान तीन/चार बजेदेखि सुरु भएको वर्षा अहिले पनि भइरहेको छ,” उनले भने, “यो क्रम शुक्रबारसम्म रहनेछ । त्यसपछि भने मौसम केही खुल्नेछ ।”
काठमाडौंमा भारी वर्षाको सम्भावना भने छैन । हल्कादेखि मध्यम वर्षा हुने मौसमविद् प्रधानाङ बताउँछन् ।
मनसुनी गतिविधि सक्रिय हुँदा काठमाडौंसहित केही भू–भागमा केही दिनयता वर्षा भइरहेको छ । हाल मनसुनको न्यूनचापीय रेखा सरदर स्थानभन्दा उत्तरमा छ । नेपालमा हाल भारतको उत्तर प्रदेशको उत्तर–पश्चिम क्षेत्रमा अवस्थित न्यूनचापीय क्षेत्रको समेत प्रभाव रहेको छ ।
पाल्पा, नवलपुरलगायत भू–भागमा भारी वर्षा भएको छ । बिहान ५ बजेदेखि पाल्पाको अर्चले, नवलपुरको देउराली र आसपासका क्षेत्रमा भारी वर्षा भएको बाढी पूर्वानुमान महाशाखाले जनाएको छ ।
गण्डकी, वाग्मती, मधेस र कोसी प्रदेशका केही स्थानमा बिहानैदेखि मध्यम वर्षा भइरहेको छ ।
