पुष्पलाल मध्यपहाडी राजमार्गको दैलेख खण्डको काम कछुवा गतिमा सीमित रहेको छ । काम शुरु भएदेखिनै ट्र्याक खोल्ने, ग्राभेल गर्ने र पिच गर्ने चरणबद्धरूपमा हुँदै आएको भए पनि गतिमा ढिलाइ भएको छ ।
आयोजनाले सडकको सबै पूर्वाधारको तयारीपश्चात् विसं २०७३ देखि मात्रै कालोपत्रेका लागि ठेक्का खोलिएको दैलेख खण्डमा पर्ने १२५ किलोमिटर सडकमध्ये २५ किलोमिटर मात्र कालोपत्रे भएको छ । अब काम धमाधम अगाडि बढिरहेको मध्यपहाडी आयोजना कार्यालय दैलेख प्रमुख डा अर्जुनकुमार बमले बताए ।
दुई वटा पक्की पुलसहित १२ वटा ठेक्का अहिले सञ्चालनमा आएका छन् । काम शुरु भएदेखि यो वर्षसम्मको ठेक्कामा कूल रु चार अर्ब २७ करोडको लागतमा विभिन्न स्थानमा काम शुरु गरिएको छ । अहिलेसम्म रु एक अर्ब ३४ करोड भुक्तानी भइसकेको आयोजनाले जनाएको छ ।
Advertisement
मध्यपहाडी राजमार्ग आयोजना कार्यालय दैलेखका प्रमुख बमका अनुसार रुकुम पूर्व र अछामसम्म रु १० अर्ब ८८ करोड ५९ लाख बराबरको विभिन्न ठेक्कामार्फत सडक कालोपत्रेका लागि काम शुरु भइरहेकोे छ ।
पक्की नाली र ग्राभेल उप्काउँदै कालोपत्रेको तयारी
मध्यपहाडी सडकखण्डअन्तर्गत दैलेख खण्डका कतिपय स्थानमा छ वर्षअघि पक्की नाली र ग्राभेल सम्पन्न भएको थियो । उक्त कामका लागि करोडौँ रकम राज्यकोषको खर्च गरियो तर अहिले पक्की नाली भत्काएर पुनः काम शुरु भइरहेको छ ।
ग्राभेल थुपारेर राखिएको छ । वन क्षेत्र र सहजै सडक चौडा गर्न सकिने स्थानमा बनाइएका नाली पुरिनु र ग्राभेल जम्मा गरेर राखिनुले यसअघि गरिएको गलत इञ्जिनीयरिङका कारण राज्यकोषको करोडौँ रकम फजुल खर्च भएको स्पष्ट देखिएको छ ।
विशेष गरेर सदरमुकामको लोहोरेदेखि भैरवी गाउँपालिका र दुल्लु नगरपालिकाको सिमाना चगर्तासम्मको सडकखण्डमा अहिले कुनै पनि पुरानो संरचना देख्न र भेट्न पाइँदैन । करोडौँ रकम यसअघि यही सडकमा खर्च भयो, ओहोरदोहोर गर्दा देखिने पुराना संरचना अहिले कुनै पनि देखिँदैनन्, ग्राभेल थुपारेर राखिएको छ । यसरी सडककै नाममा फजुल खर्च नियोजित रूपमा गरिएको हुनसक्ने यस्ता कुराको छानबिन हुनुपर्ने माग स्थानीयवासीको छ ।
विगत छ वर्ष अघिदेखिको कामको सूचना माग गर्दासमेत आयोजनाले सूचना प्रदान गर्न सकेन । अहिले विभागमा मात्र यसको जानकारी हुने भन्दै विवरण उपलब्ध गराउन नसकिएको आयोजनाका कर्मचारीले बताउँदै आएका छन् ।
चार कम्पनीको म्याद थप
सदरमुकामको पूर्वी खण्डमा पर्ने विभिन्न सडकखण्डको कालोपत्रेको काम विसं २०७७ असारसम्म सम्पन्न गरिसक्नुपर्ने ठेक्का सम्झौता गरेका चार कम्पनीले कोरोना कहर देखाउँदै पुनः छ महिनाका लागि म्याद थप गरेका छन् ।
विसं २०७७ असारसम्म काम सक्ने जिम्मेवारी पाएका रमन केएल जेभी, शर्मा गजुरमुखी, पुप्पु हाई हिमालय जेभीले म्याद थप गरेको आयोजनाले जानकारी दिएको छ । दैलेख खण्डका लागि ठेक्का सम्झौता गरेका अन्य नौ वटा कम्पनीको म्याद २०७८ र २०७९ मा सम्पन्न हुने सम्झौतामा उल्लेख गरिएको छ ।
मुआब्जाको काम अगाडि बढ्यो
मध्यपहाडी राजर्माग सडकखण्डको विवाद भएको स्थान सदरमुकाम खण्डलगायतका अन्य विभिन्न खण्डमा देखिएका विवादको समाधान गर्दै सबै खण्डमा कालोपत्रेका लागि ठेक्का खोलिसकिएको छ । समस्या समाधानका लागि रु चार करोडको मुआब्जा वितरण गर्ने तयारी गरिएको आयोजना कार्यालयले जनाएको छ । मुआब्जाको विवरण सङ्कलन र मूल्याङ्कन रकमको विवरण प्राप्त भइसकेकाले तत्कालै प्रक्रियामा अगाडि बढाइने जानकारी आयोजनाले दिएको छ ।
साभार: रातोपाटी
