१८ असार, काठमाडौं । क्रियाशील सदस्यता छानविनका लागि मापदण्ड बनाउन बोलाइएको नेपाली कांग्रेस पदाधिकारी बैठक अझै सुरु भएको छैन । दिउँसो 2 बजेका लागि बोलाइएको बैठक पाँच बज्दा समेत सुरु भएको छैन ।
शीर्ष नेताहरुसहित पूर्वपदाधिकारी र क्रियाशील सदस्यता छानबिन समितिका सदस्यलाई पनि बोलाएको बैठकमा नेताहरु पार्टी कार्यालय सानेपामा आन्तरिक छलफलमै छन् ।
क्रियाशील सदस्यता छानविनका लागि मापदण्ड नहुँदा समितिको काम प्रभावित भएको छ । असार २० गतेसम्म काम सक्नुपर्ने जिम्मेवारी पाएको समितिले मापदण्ड नहुँदा विवादित जिल्लाका क्रियाशील सदस्यता छानविनको काम अगाडि बढाउन सकेको छैन ।
Advertisement
मापदण्ड बनाउने जिम्मा पार्टी पदाधिकारीलाई दिइएपनि शीर्ष नेताहरुबीच साझा धारणा बन्न नसकेको हो । अहिले पार्टी कार्यालयमा नेताहरु आ–आफ्नो समूहसँग छलफलमा रहेको एक नेताले बताए । नेताहरुबीच अनौपचारिक सहमति जुटेपछि बैठक सुरु हुने ति नेताले बताए ।
आइतबारको पदाधिकारी बैठकमा समिति संयोजक रमेश लेखकले मापदण्डबारे मौखिक प्रस्ताव पेश गरेका थिए । उक्त प्रस्तावमाथि शीर्ष नेताहरुबीच समान धारणा बन्न नसकेपछि थप छलफल गर्ने गरी शुक्रबार बैठक बोलाइएको हो । पार्टी कार्यालयमा सभापति शेरबहादुर देउवा, बरिष्ठ नेता रामचन्द्र पौडेल, उपसभापति विमलेन्द्र निधि, महामन्त्रीद्वय डा शशांक कोइराला, पुर्णबहादुर खड्का, पूर्वमहामन्त्री कृष्णप्रसाद सिटौलालगायत रहेका छन् ।
क्रियाशील सदस्यता छिटो टुंग्याउनुपर्ने दवावमा कांग्रेस छ । पदाधिकारी बैठकले मापदण्ड टुंग्याए असार मसान्तभित्र सबै जिल्लाको सदस्यता टुंग्याउने समिति सदस्य कल्याण गुरुङले बताए । उनले मापदण्ड नहुँदा गम्भीर विवाद देखिएका करिव २५ जिल्लाको सदस्यताको काम रोकिएको बताए ।
Credit: OnlineKhabar
