तनहुँका महिला जनप्रतिनिधिले प्रमुख पदमा नेतृत्व ग्रहण गर्न आफूहरू सक्षम रहेको बताएका छन्।
Advertisement
वि.सं २०७४ को स्थानीय तहको निर्वाचनदेखि उपप्रमुख, उपाध्यक्ष, वडा सदस्य र कार्यपालिका सदस्यमा निर्वाचित भएका यहाँका जनप्रतिनिधिले अब हुने निर्वाचनमा प्रमुख पदमा नेतृत्व लिन आफूहरू सक्षम रहेको बताएका हुन्।
व्यास नगरपालिकाका उपप्रमुख मीरा जोशीले महिलाहरू पनि प्रमुख पदको नेतृत्व गर्न सक्षम भएको बताए।
पाँच वर्षको अनुभवले धेरै कुरा सिकाएको जानकारी दिँदै उनले भनिन्, ‘यो बीचमा अनुभव बटुल्यौं, प्रमुख भएर नगरपालिका चलाउने दृढ इच्छाशक्ति र सङ्कल्प छ। हामी केही कुरामा पनि कम छैनौं।’
‘नगरप्रमुखको आकाङ्क्षी धेरै हुने गरेकाले महिलाहरू पनि अब नेतृत्वमा आउनुपर्छ’ उपप्रमुख जोशीको भनाइ थियो, ‘सँग-सँगै राजनीति गरेकाहरू प्रदेश सांसद भइसके, निर्वाचनमा अब मेरो दाबेदारी नगर प्रमुखमा रहन्छ।’
जिल्लाको सबभन्दा ठूलो नगरपालिकाको उपप्रमुख भएर काम गरिरहँदा सोचे अनुरूपको केही कामहरू भने गर्न नसकिएको उनको भनाइ थियो।
घिरिङ गाउँपालिकाका उपाध्यक्ष सरस्वती सिग्देलले अबको निर्वाचनमा आफ्नो दाबेदारी अध्यक्ष पदका लागि हुने बताइन्। टिकट दिने विषय पार्टीको भएकाले महिलालाई अगाडि बढाउन पार्टीले पनि सोच्नुपर्नेमा उनले जोड दिइन्।
‘पहिला पार्टीबाट अनुमोदन भएर टिकट पाएको खण्डमा जनताबाट पनि अनुमोदन हुन सक्छु भन्ने आत्मविश्वास छ’, उपाध्यक्ष सिग्देलले भनिन्, ‘अध्यक्ष भएर जनताको सेवा गर्ने संकल्प गरेको छु।’
उनले पाँच वर्षको अवधिमा उज्यालो घिरिङ, घरघरमा धारा, सडक स्तरोन्नतिलगायत कामहरू गरिएको जानकारी दिइन्।
‘हामी निर्वाचित भएर आउँदा गाउँपालिकाको कार्यालय थिएन, सडक आयोजनाको घरमा बस्यौं, संघीयतापछिको पहिलो जनप्रतिनिधि भएकाले धेरै कुरा सिक्न समय पनि लाग्यो’, उनले भनिन्, ‘काम गर्दै जाँदा अनुभव हासिल भयो, अब त अध्यक्ष भएर गाउँपालिका चलाउन सक्छु।’
आँबुखैरेनी गाउँपालिकाका उपाध्यक्ष पुष्पादेवी श्रेष्ठले कोरोना महामारीका कारण सोचे जति काम गर्न नसकिएको बताइन्।
‘धेरै कुरा गर्छौं भन्ने जोसका साथ आएका थियौं, पहिलो वर्ष सिक्नमै समय गयो, दोस्रो वर्ष पहिलो वर्षको कार्यक्रम लागू गर्न अगाडि बढ्यौं, तेस्रो वर्षदेखि कोरोना आयो’, उनले भनिन्, ‘यति हुँदाहुँदै पनि भौतिक पूर्वाधार, हरेक वडासम्म पुग्ने सडक निर्माण, वडा कार्यालय भवन, स्वास्थ्य केन्द्रका भवन बनाएका छौं।’
उपाध्यक्ष भएर काम गरेको अनुभवका आधारमा अब गाउँपालिका अध्यक्ष भएर काम गर्ने इच्छाशक्ति उत्पन्न भएको श्रेष्ठले बताए।
घिरिङ गाउँपालिका-२ की वडा सदस्य सनम थापाले सदस्यमा काम गरेको अनुभवका आधारमा अब वडाध्यक्षका लागि आफ्नो जिकिर रहेको बताइन्।
‘वडा सदस्य भएर सिकेको अनुभवका आधारमा वडाध्यक्ष चलाउन सक्छु’, उनले भनिन्।
व्यास नगरपालिका–४ की वडा सदस्य बसुन्धरा घर्तीले महिलाहरू अब नेतृत्वमा आउनै पर्नेमा जोड दिइन्।
‘महिलाहरू पनि पुरूष सरह हरेक काममा सक्षम छन्, अब नेतृत्वमा महिला पुग्नुपर्छ, त्यसका लागि सबै महिलाले आवाज उठाउनुपर्छ’, उनले भनिन्।
