काठमाडौं । सत्तारुढ दल नेपाली कांग्रेस सांसद डा. डिला संग्रौला पन्तले सरकाले आगामी वर्षका लागि प्रस्तुत गरेको बजेटमा कोभिड संकटबाट रोजगारी र आय श्रोत गुमाएका महिलाहरूलाई रोजगारी र आय आर्जनका कार्यक्रममा प्राथमिकता दिन आग्रह गरेकी छन् ।
Advertisement
मंगलबार प्रतिनिधिसभा बैठकमा बजेटमाथि भएको छलफलमा बोल्दै उनले सरकारले प्रस्ततु गरेको बजेटमा सामाजिक सुरक्षा कार्यक्रमहरूलाई दीगो र भरपर्दो बनाउन पनि चुनौती रहेको बताइन् । साथै, उनले बजेटमा दुई लाख युवाहरूलाई रोजगारी दिने भनिए पनि त्यसमा स्पष्ट दृष्टिकोण आउन नसकेको बताइन् ।
“सरकारले किसान पेन्सनको कार्यक्रम घोषणा गरेको छ । कृषिप्रधान मुलुक नेपालमा यो आवश्यक थियो, तर त्यो कसरी कार्यान्वयन हुने हो सोको जानकारी आवश्यक छ । बजेटमा आर्थिक वृद्धिको लक्ष्य ८ प्रतिशत र मूल्य वृद्धिको प्रक्षेपण ७ प्रतिशत भनिएको छ । सामान्यतया मूल्यवृद्धिभन्दा आर्थिक वृद्धिदर बढी हुन्छ भन्नु त्यति व्यावहारिक देखिँदैन,” उनले भनिन्,“ देशभित्रको पुँजीलाई कसरी परिचालन गर्ने र वैदेशिक लगानीलाई कसरी आकर्षित गर्न सकिन्छ ? भन्ने गुणात्मक प्रकृतिका योजनाहरू बजेटमा समावेश भएको भए राम्रो हुने थियो ।”
