काठमाडौं । उपप्रधान एवं गृहमन्त्री नारायणकाजी श्रेष्ठले सरकार सुशासन कामय गर्न, मुलुकमा हुने भ्रष्टाचार, दण्डहीनता, ठगी र अपराधविरुद्धको अभियानबाट विश्राम लिने पक्षमा नरहेको बताएका छन् ।
सोमबार सिंहदरबारस्थित मन्त्रालयमा गृह मन्त्रालयको आर्थिक वर्ष २०७९/०८० को अन्तिम त्रैमासिक समीक्षा कार्यक्रममा बोल्दै गृहमन्त्री श्रेष्ठले सरकारको अभियानलाई विश्राम नलिई अगाडि बढाउने पक्षमा रहेको बताए ।
Advertisement
मुलुकमा सुशासन कायम गर्ने विषय पूर्वसर्तको रुपमा लिए भ्रष्टाचार, दण्डहीनता, ठगी अपराधविरुद्धमा कोही पनि निर्दोष नफसुन् र दोषी नउम्किउन् भन्ने हिसाबले काम गरिरहेको उनले बताए ।
मुलुकका जनताले स्वतन्त्रतापूर्वक जीवन बाच्ने वातावरण बनाउने र अपराधी, भ्रष्ट, ठग, तस्कर र अनियमितता गर्नेहरुलाई कानुनको दायरामा ल्याउने गरी काम अगाडि बढाएको उनले दाबी गरे । पुरानै गतिमा काम गरेर नपुग्ने निष्कर्षमा सरकार रहेको उनको भनाइ छ ।
मुलुकमा अहिलेसम्म भएका राजनीतिक परिवर्तनबाट समृद्धिको क्षेत्रमा केही सुधार भए पनि पर्याप्त नभएको मन्त्री श्रेष्ठले बताए । अर्थतन्त्रका तत्कालीन समस्या समाधान गरी अर्थतन्त्रलाई लयमा ल्याएर मात्रै समृद्धिको यात्रा तय गर्न सकिने विषयमा सरकार गम्भीर भएर काम गरिरहेको उनले बताए ।
“सरकार गम्भीरतापूर्वक सुशासन समृद्धि र सामाजिक न्यायको लक्ष्य पूरा गर्न लागि राखेका छौँ,” उनले भने, “गृह मन्त्रालयको काम अझ व्यवस्थित, प्रभावकारी र परिणाममुखी बनाउन आत्मसमीक्षाको प्रक्रियामा छौँ । त्यसलाई सुधारको अभियानका रुपमा अगाडि बढाएका छौँ ।”
गृहमन्त्री श्रेष्ठले अर्थ मन्त्रालयलाई सुपर मन्त्रालयका रुपमा ठान्न नहुने बताए । सबै मन्त्रालयलाई बजेटको सिलिङ तोक्ने आफू भएको भन्ने हिसाबले निर्देशात्मक रुपमा अर्थ मन्त्रालय जान नहुने उनले बताए ।
“अर्थ मन्त्रालय पनि सुपर मन्त्रालय होइन । अर्थ मन्त्रालय अन्य सबै मन्त्रालयलाई यस्तो गर, यस्तो नगर भन्ने होइन,” उनले भने, “देश विकास र समृद्धि साझा लक्ष्य हो । त्यसकारण सरकारसँग भएको बजेट यति हो । अहिलेको सिस्टमले केके गर्ने प्रथामिकता हेरेर सल्लाह गर्ने हो । यतातिर गयो भने मन्त्रालयगत रहेको समस्या हल गर्न सकिन्छ ।”
