काठमाडौं । नेपाली कांग्रेसका नेता विमलेन्द्र निधिले स्थानीय तहलाई दिएको अधिकार पनि केन्द्रीय तहबाटै निर्देशित हुनुपर्छ भन्ने मानसिकता हाबी भएको बताएका छन् ।
Advertisement
शनिबार काठमाडौंमा कांग्रेस स्व. नेता प्रदीप गिरीको स्मृति दिवसलाई सम्बोधन गर्दै उनले संविधानले स्थानीय तह र प्रदेश सरकारलाई अधिकार दिएको भए पनि गृहमन्त्री वा प्रधानमन्त्रीले नै अधिकार प्रयोग गर्नुपर्छ भन्ने मानसिकताबाट नेतृत्व वर्ग निर्देशित रहेको बताए ।
अवशिष्ट अधिकार नेतृत्वले लिनका लागि संविधानमा राख्न पहल गर्दा पनि कांग्रेसका नेताहरुले नमानेको भन्दै आपत्ति उनले जनाए । अवशिष्ट अधिकार सार्वभौम जनतामा निहीत हुनुपर्ने उनको भनाइ छ ।
“अवशिष्ट अधिकार भनेको त सार्वभौम सत्ता जसमा निहीत हुन्छ, त्यो निहीत अधिकारको तह जनतामा हुन्छ । त्यसैले तल्लो निकायमा हुनुपर्छ भनेर लेख्नुपर्छ भन्ने उहाँ (प्रदीप गिरि), म पनि,” उनले भने, “तर, संविधानमा लेख्न नेपाली कांग्रेसका कुनै पनि नेताले मानेनन् । किनभने आफूमा राख्न चाहन्छन् नि सबै अधिकार त ।”
स्व. गिरि बहुप्रतिभाशाली व्यक्ति रहेको उल्लेख गर्दै निधिले उनको जीवन राजनीतिकर्मीका लागि प्रेरणादायी रहेको उल्लेख गरे ।
