काठमाडौं । कोसी प्रदेश सरकारविरुद्ध दायर गरिएको रिट सर्वोच्च अदालतका न्यायाधीशत्रय सपना प्रधान मल्ल, कुमार चुडाल र नहकुल सुवेदीको पूर्ण इजलासमा परेको छ ।
Advertisement
कोसी सरकारका मुख्यमन्त्री उद्धव थापासहितलाई विपक्षी बनाउँदै नेकपा (एमाले) संसदीय दलका नेता हिक्मतकुमार कार्कीले दायर गरेको रिटमाथि आजदेखि नियमित सुनुवाइ हुनेछ ।
यसअघि, यही भदौ ७ गते ईश्वरप्रसाद खतिवडाको इजलासले कोसी सरकारविरुद्ध अन्तरिम आदेश जारी गरेको थियो । अदालतले दीर्घकालीन असर गर्ने निर्णय नगर्न आदेश दिएको थियो ।
थापाले प्रदेशसभाबाट विश्वासको मत लिने दिन सभाध्यक्षमण्डलका सदस्य नेपाली कांग्रेसका इस्राइल मन्सुरीले बैठक सञ्चालन गरेका थिए । प्रदेशसभामा मतदान हुँदै थियो । मत सच्याउने अवधि सकिएपछि मन्सुरीले पनि मुख्यमन्त्री थापाको पक्षमा मतदान गरे ।
त्यति बेला उनले माओवादी केन्द्रकी सांसद गीता तिम्सिनालाई सभा सञ्चालनको जिम्मेवारी दिएका थिए । पछि मन्सुरीले नै थापाले विश्वासको मत पाएको घोषणा गरे ।
त्यो सम्पूर्ण प्रक्रिया असंवैधानिक भन्दै कार्कीले रिट दायर गरेका हुन् । प्रारम्भिक सुनुवाइ गर्दै सर्वोच्चले सभाध्यक्षले मत हाल्न नपाउने स्पष्ट पारेको छ ।
त्यसपछि भदौ १५ गतेका लागि पेसी तोकिएको थियो । उक्त दिन खतिवडाकै इजलासमा परेपछि ‘हेर्न नमिल्ने’ हुँदै १७ गतेका लागि पेसी तोकियो । १७ गते (आइतबार) न्यायाधीशद्वय सपना प्रधान मल्ल र सुष्मलता माथेमाको इजलासमा परेको रिटमाथि गम्भीर संवैधानिक निर्णय गर्नुपर्ने भन्दै पूर्ण इजलासमा पठाउने निर्णय गरिएको हो । अब पूर्ण इजलासमा निरन्तर सुनुवाइपछि अन्तिम फैसला दिइनेछ ।
