विराटनगर । प्रदेशसभाको दोस्रो निर्वाचनपछि कोसी प्रदेशमा गएको पुस २४ गते नेकपा (एमाले) संसदीय दलका नेता हिक्मत कार्की मुख्यमन्त्री नियुक्त भए । उनलाई नेकपा (माओवादी केन्द्र), राष्ट्रिय प्रजातन्त्र पार्टी (राप्रपा) र जनता समाजवादी पार्टी (जसपा)ले समेत समर्थन गरेका थिए ।
९३ मध्ये ६० सांसदको समर्थनमा मुख्यमन्त्री बनेका कार्कीले पुस २५ गते मन्त्रिमण्डल विस्तार गरे । त्यसयता यहाँ चारपटक मुख्यमन्त्री र १५ मन्त्री फेरिएका छन् । यो अवधिमा नौपटक मन्त्रिमण्डल हेरफेर गरिएको छ । पछिल्लोपल्ट गठित सरकारले समेत विश्वासको मत प्राप्त गर्ने/नगर्ने टुंगो छैन ।
Advertisement
पुस २४ गते बलियो बहुमतसहित गठित कार्की नेतृत्वको सरकार असार १५ गते ढल्यो । कार्कीले प्रदेशसभाबाट विश्वासको मत प्राप्त गर्न सकेनन् । एमालेबाहेक राप्रपाले मात्र साथ दिँदा उनले ४६ मत पाए । प्रदेशसभाको विश्वास प्राप्त गर्न ४७ मत आवश्यक थियो ।
केन्द्रमा फेरिएको सत्ता गठबन्धनको असर कोसीमा पनि परेको थियो । माओवादी र जसपा प्रतिपक्ष दल नेपाली कांग्रेसतिर ढल्कँदा कोसीमा एमाले नेतृत्वको सरकार ढलेको थियो ।
कार्की दोस्रो कार्यकालका लागि भदौ २१ गते पुनः मुख्यमन्त्रीमा नियुक्त भएका छन् । यसअघि, निवर्तमान मुख्यमन्त्री उद्धव थापाले विश्वासको मत लिने क्रममा सभाध्यक्ष इस्राइल मन्सुरीले समेत मतदान गरेका थिए । सर्वोच्च अदालतले त्यो प्रक्रियालाई बदर गरिदियो । सर्वोच्चले संविधानको धारा १६८ (३) बमोजिम ठूलो दलको नेतालाई मुख्यमन्त्री बनाउन परमादेश दिएको थियो । सर्वोच्चको परमादेशसँगै कार्की मुख्यमन्त्रीमा दोहोरिएका हुन् ।
असार २१ गते थापाले सभामुखको समेत हस्ताक्षर गराएर सरकार गठनका लागि पहिलोपल्ट दाबी पेस गरेका थिए । उनलाई मुख्यमन्त्रीमा नियुक्त गरियो । साउन ११ गते सर्वोच्चले त्यो प्रक्रियालाई पनि बदर गरिदिएको थियो । त्योसँगै उनी पदमुक्त भए । साउन १६ गते थापा दोस्रोपटक मुख्यमन्त्री बन्दा सभामुख बाबुराम गौतमलाई पदबाट राजीनामा दिन लगाइएको थियो ।
कार्कीले पहिलोपल्ट मन्त्रिमण्डलमा एमालेका तिलकुमार मेन्याङ्बो, राप्रपाका भक्ति सिटौला र जसपाकी निर्मला लिम्बूलाई सहभागी गराएका थिए । पुस २९ गते माओवादी केन्द्रका दुर्गाप्रसाद चापागाईं र जीवन आचार्य र एमालेका बुद्धिकुमार राजभण्डारीलाई मन्त्रीमा नियुक्त गरिएको थियो ।
कार्की सरकार ढलेपछि असार २२ गते तत्कालीन मुख्यमन्त्री उद्धव थापाले नेकपा (एकीकृत समाजवादी)का कमलप्रसाद जबेगू र कांग्रेसका प्रदीपकुमार सुनुवारलाई मन्त्री बनाए । असार २४ गते माओवादीका जीवन आचार्य र राजेन्द्र कार्की र कांग्रेसका रामकुमार खत्री मन्त्री बनाइए । साउन ११ गते सर्वोच्चको आदेशसँगै सरकार ढल्यो ।
साउन १६ गते थापा पुनः मुख्यमन्त्रीमा नियुक्त भए । उनले भोलिपल्ट मन्त्रिमण्डल विस्तार गरे । माओवादीका बाबुराम गौतम, कांग्रेसका प्रदीपकुमार सुनुवार र एकीकृत समाजवादीका कमलप्रसाद जबेगूलाई मन्त्री बनाए । मन्त्रिमण्डलमा साउन २६ गते जसपाकी निर्मला लिम्बू थपिइन् । साउन ३१ गते कांग्रेसका गयानन्द मण्डल राज्यमन्त्रीमा नियुक्त गरिए । उनी प्रदेशसभाका ज्येष्ठ सदस्य हुन् ।
सर्वोच्चको परमादेशसँगै भदौ २२ गते मुख्यमन्त्री बनेका कार्कीले एमालेका तिलकुमार मेन्याङ्बो, एकराज कार्की, पाँचकर्ण राई र सिर्जना राईलाई मन्त्री बनाएका छन् ।
प्रदेशसभाको पहिलो कार्यकालमा एमालेका शेरधन राई र भीम आचार्य र एकीकृत समाजवादीका राजेन्द्र राई मुख्यमन्त्री बनेका थिए । पहिलो पाँचवर्षे कार्यकालमा कोसीमा ३३ जना मन्त्री बनेका थिए । सातपटक मन्त्रिमण्डल विस्तार गरिएको थियो ।
