काठमाडौँ । जनता समाजवादी पार्टी (जसपा) नेपालका अध्यक्ष उपेन्द्र यादवले मधेसको माग पूरा गर्ने भन्दै प्रधानमन्त्री केपी शर्मा ओलीले मधेसी जनतालाई भ्रममा पारेको दावी गरेका छन् । जसपा नेपालका अध्यक्ष महन्थ ठाकुर र वरिष्ठ नेता राजेन्द्र महतोले प्रधानमन्त्री ओलीबाट मधेसका माग पूरा भएको र अन्य मागसमेत पूरा गर्न लागेको प्रतिकृया दिइरहेको बेला अर्का अध्यक्ष यादवले मधेसका के के माग पूरा भए भन्नेबारे प्रस्ट पार्न चुनौतीसमेत दिएका छन् ।
Advertisement
उनले मधेसका माग १२ बुँदामा लिपिबद्ध गर्दै तीमध्ये प्रधानमन्त्री ओलीले कुन कुन माग पूरा गरे भन्नेबारे प्रस्ट पार्न मधेसी नेताहरुलाई चुनौती दिएका हुन् । अध्यक्ष यादवले आफ्नो फेसबुकमा लेखेका छन्, ‘प्रधानमन्त्री ओलीले मधेसीहरुका सबै माग मुद्दाहरू पूरा गर्छन् भन्ने स्वघोषित मधेसी नेताले भन्नु पर्छ कि यीमध्ये कुन कुन माग पूरा गरिदिए ? नत्र झुठो बोली मधेसीहरुलाई भ्रममा पारी धोखा दिने र आफ्नो स्वार्थपूर्ति गर्ने काम नहोस् ।’
यी हुन् उपेन्द्र यादवले प्रस्तुत गरेका बुँदा
१. आत्मनिर्णयको अधिकारका साथै स्वायत्त मधेस प्रदेशसहित पहिचानमा आधारित (१०+१) प्रदेशको स्थापना ।
२. समानुपातिक निर्वाचन प्रणाली ।
३. शासन–प्रशासन, न्यायपालिका, सेना, प्रहरी, कर्मचारीतन्त्र आदिमा सामुदायिक/जातीय जनसंख्याको आधारमा समानुपातिक समावेशीकरण ।
४. सरकारी कामकाजी भाषामा समान–बहुभाषिक नीति ।
५. मधेसी समुदायको राष्ट्रिय पहिचानको मान्यता ।
६. दलित, महिला र उत्पीडित समुदायको लागि आरक्षण र सामाजिक न्यायको व्यवस्था ।
७. राज्यद्वारा प्रदान गरिने सेवा, सुविधा र अवसरमा समान पहुँचको प्रत्याभूति ।
८. वर्ग, वर्ण, लिङ्ग, जात÷जातिका आधारमा हुने शोषण, उत्पीडन र विभेदको अन्त्य ।
९. नागरिकता समस्याको समाधान ।
१०. जल, जङ्गल र जमिनमाथिको अधिकार ।
११. संविधान संशोधन गरी राष्ट्रिय समस्याहरूको समाधान ।
१२. मधेस र थरूहट आन्दोलनको दौरान लगाइएका मुद्दाहरुको खारेजी, रेशम चौधरीलगायत सम्पूर्ण राजबन्दीहरुको रिहाई ।
साभार: रातोपाटी
